.png)
Банзай Зайцев Кыргысович 1943 чылдың декабрь 15-те Эрзин кожууннуң Булун-Бажы суурга арат өг-бүлеге төрүттүнген. Ада-иезин "контр" дээш узуткаан, ачазы Тыва Республиканың база бир элчини бооп, моол дыл талазы-биле очулдурукчу бооп чораан. Школаны 1962 чылда дооскаш, Бурятияның көдээ ажыл-агый институдунуі "зоотехния" талазын 1967чылда дооскан. Аңаа өөнүң ишти Кама Хертековнага душкаш, олчаан ийелээн Эрзин кожуунга ажылдап кирипкеннер.
"Ленин" аттыг совхозка 1971-1976 чылдарда кол зоотехниктээш, совхоз директору кылдыр депшээш, чымыштыг ажы-ижи-биле кожуун чергениң кол зоотехнигинге чедир депшээн. Ол үелерде "Ленин" совхозка фермаларны тудуп, аныяк өскенни күш-ажылга хаара тудуп, көржең аштап, аалдарже хой кыргылдаларынга, сиген кезер, картошка ажаар ажылдарга киириштирип турган.
1977 чылдан эгелеп Эрзин, Тес-Хем кожуунарының администрацияларынга кожуунуң кол зоотехниги бооп, үре-түңнелдиг ажылдап, чаңгыс эвес удаа хүндүлел бижиктерни ап чораан. Сөөлгү хонуунга чедир Эрзин кожуунуң администрациязынга ажылдаан. Ол спортка база хандыкшылдыг чораан, ылаңгыя бокс, волейбол, хаак, шахмат ойнаарынга ынак чораан.
Банзай (Чымы) Кама Хертековна, 1942 чылдың декабрь 15-те арат өг-бүлениң 12 акы-дуңмаларның ортуну бооп төрүттүнген. Кызылдың 2 дугаар школазынга 1952 чылда киргеш, 1962 чылда дооскаш, Бурятияның көдээ ажыл-агый институдунуң агрономия талазын чедиишкинниг дооскаш, Эрзин кожуунга ажылдап эгелээн. Ол үеде чер ажылы сайзыраваан турган болгаш аныяк специалист бүгү күжүн салып тургаш, тараа, мал чемин көвүдедип, Эрзин чонун хаара тудуп тургаш, чоорту эки түңнелдерге чедирип келген. Кыргыс-Тей, Ямаалыг, Кара-Хая хову станнары көвүдеп, чон мал-чемин, тарааны, картошканы эвээш эвес ажаап чораан. Кожуун иштинде тракторист, комбайнерларын бо-ла сактып чугаалап кээр. База-ла аныяктарны, школачыларны, сургуулдарны дүжүт ажаалдаларынга киириштирип, күш-ажыл-биле кижизиделгени чорудуп, өөредип, айтып чораан.
Амгы уеде ол хүндүлүг дыштанылгада.
Банзайлар үш кыс кижизидип, дээди эртем-билигге чедирип кааннар.
Уругларының дамчыткан материалындан
Эрзинниң 85 чыл оюнга. Кожууннуң сайзыралынга үлүүн кииргеннер. Зайцев биле Кама Банзайлар
26 Июл.
