.png)
#85юбилейЭрзинКожуун Ольга Куулар, Эрзин кожуннуң культура болгаш туризм килдизиниң начальниги:
"Бо фестиваль Тываның 40 чылы дээш парка "Зелёный театр" сценазынга болган ол үени дыка эки сактыр мен. Ынчан бичии турган мнн, ол концертиң номерлерин шуптузун дыка эки билир турдум ийин. Ынчан Эрзинниң артистери дыка хөй турган. "Пионер" кинотеатры чанында СПТУ-1 общежитиезинге чурттап турдулар.
Орус оркестр ойнап турган, дирижёру Раиса Качаловна турду, хорну Валентина Васильевна дирижёрлап турган. Ол үеде чаа костюмнарны олар культура аямызындан алдылар. Ынчан мээң авамның культурага ажылдап турган үелери чүве. Танцы хептери дыка чараш турду, "Торгутский танец" диңмиреп турган үе болгай.
Танцор угбаларывыс: Соян Россина Маадыровна, Холчук-оол Сайлык угбай, Дажымба Долаана Даниловна, Шойжулчаева Саулэ угбай, Боодей Анисья угбай, Чындыгыр Раиса угбай дуңмазы-биле, Чымба (Руденко) Светлана угбай дээш дыка хөй тургузуглуг самчылар үнүп кээрге, зал алгы-кышкы, диңмиредир часкап турар турду. Концерттиң чарлакчылары Игорь Кыргысович, Ольга Кыргысовна турганнар. Елена Сереновна Каганович башкы партия, Ленин дугайында шүлүктеп турган деп сактып ор мен.
Бо чурукта хорнун хептери көк өңнүг, бөрттеринде хүрең кештиг, оркестр улузу чырык өкпең хөйлеңнерлиг, хүрең узун юбкаларлыг, "Торгутский танец" самның хептери сарыг платьелер, ногаан дыка чараш кандазаларлыг, шупту чаа хептер турду ол үеде.
1984 чыл боор оң, ол үеде тос харлыг турган-дыр мен"
Бир чуруктуң төөгүзү. Эрзин кожуннуң культура болгаш туризм килдизиниң начальниги Ольга Кууларның сактыышкыны
19 Авг.
